ruKhoN ke chaaNd, laboN ke gulaab maange hai
badan kii pyaas, badan kii sharaab maange hai
maiN kitne lamhe na jaane kahaaN gaNvaa aayaa
terii nigaan to saaraa hisaab maange hai
maiN kis se puuchhne jaauuN ki aaj har koii
mere sawaal kaa mujhse jawaab maange hai
dil-e-tabaah kaa yah hauslaa bhii kyaa kam hai
har ek dard se jiine kii taab maange hai
bajaa ki vazaa-e-hayaa bhii hai ek chiiz magar
nishaat-e-dil tujhe be-hijaab maange hai
Jaan Nisar Akhtar
----------------------------------------------
vo shoKh shoKh nazar saaNvlii sii ek laDkii
jo roz merii galii se guzar ke jaatii hai
sunaa hai
vo kisii laDke se pyaar kartii hai
bahaar hoke, talaash-e-bahaar kartii hai
na koi mel na koii lagaao hai lekin na jaane kyuuN
bas usii vaqt jab vo aatii hai
kuchh intizaar kii aadat sii ho gaii hai mujhe
ek ajnabii kii zaruurat ho gaii hai mujhe
mere baraanDe ke aage yah phuus kaa chhappar
galii ke moD pe khaDaa huaa saa
ek patthar
vo ek jhuktii hui badnumaa sii niim kii shaaKh
aur us pe janglii kabuutar ke ghoNsle ka nishaaN
yah saari chiizeN ki jaise mujhii meN shaamil haiN
mere dukhoN meN merii har khushii meN shaamil haiN
maiN chaahtaa huuN kii vo bhii yuuN hii guzartii rahe
adaa-o-naaz se laDke ko pyaar kartii rahe
Nida Fazli
-----------------------------------
kuchh ishq thaa kuchh majbuurii thii so maiN ne jiivan vaar diyaa
maiN kaisaa zindaa aadmii thaa ek shakhs ne mujhko maar diyaa
ek sabz shaakh gulaab kii thaa, ek duniaa apne khwaab kii thaa
voh ek bahaar jo aaii nahiin uske liye sab kuchh vaar diyaa
ye sajaa sajaaya ghar saathi merii zaat nahiiN meraa haal nahiiN
aye kaash tum kabhi jaan sako, jo is sukh ne aazaar diyaa
maiN khuli huii sachchaaii, mujhe jaanne vaale jaante haiN
main ne kin logon se nafrat ki aur kin logoN ko pyaar diyaa
vo ishq bohat mushkil thaa magar, aasaaN na thaa yuun jiina bhii
us ishq ne zindaa rahne kaa mujhe zarf diyaa, pindaar diyaa
maiN rotaa huuN aur aasmaaN se taare tuut kar dekhtaa huun
un logon par jin logoN ne mere logon ko aazaar diyaa
mere bachchon ko allah rakhe in taazaa havaa ke jhokon ne
main khushk peD khizaan ka tha, mujhe kaisaa barg-o-baar diyaa
Ubaidullah Aleem
--------------------------------------
mohabbat kii duniyaa meN mashhuur kar duuN
mere saada dil tujh ko maGhruur kar duuN
tere dil ko milne kii Khud aarzuu ho
tujhe is qadar Gham se ranjuur kar duuN
mujhe zindagii duur rakhtii hai tujh se
jo tuu paas ho to use duur kaar duuN
mohabbat ke iqraar se sharm kab tak
kabhii saamnaa ho to majbuur kar duuN
ye be rangiyaaN kab tak e husn-e-rangiiN
idhar aa, tujhe ishq meN chuur kar duuN
tuu gar saamne ho to maiN beKhudii meN
sitaaroN ko sajde pe majbuur kar duuN
nahiiN zindagii ko vafaa varnaa Akhtar
mohabbat se duniyaa ko maamuur kar duuN
------------------------------
kaam ab koii na aayegaa bas ek dil ke sivaa
raaste band haiN sab kuucha-e-qaatil ke sivaa
baa'as-e-rashk hai tanhaaravii-e-rahrav-e-shauq
hamsafar koii nahiiN duuri-e-manzil ke sivaa
hamne duniaa kii har shai se uThaayaa dil ko
lekin ek shoKh ke hangaama-e-mahfil ke sivaa
teGh-e-munsif ho jahaaN, dar-o-rasan ho shaahid
begunaah kaun hai us shahar meN qaatil ke sivaa
jaane kis rang se aaii hai gulistaaN meN bahaar
koii naGhma hii nahiiN shor-e-salaasil ke sivaa
(Ali Sardar Jafri)
--------------------------------
qadam qadam pe sahaaroN ne saath chhoD diyaa
paDaa jo vaqt to yaaroN ne saath chooD diyaa
bujhii jo shamaa to parvaane ho gaye ruKhsat
huii sahar to sitaaroN se saath chhoD diyaa
vo be-naqaab hue phir nazar uThaa na sake
uThii nazar to nazaaroN ne saath chhoD diyaa
falak ke chaaNd sitaaroN se kyaa gilaa karna
zamiiN ke chaaNd sitaaroN ne saath chhoD diyaa
ab ishq hai na tabassum na zindagii hai na maut
shameem aaj to yaaroN ne saath chhoD diyaa
Shameem Jaipuri
---------------------------
baateN to hazaaroN haiN miluuN bhii to kahuuN kyaa
ye soch rahaa huuN ki use Khat meN likhuuN kyaa
aavaargii-e-shauq se saDkoN pe nahiiN huuN
halaat se majbuur huuN maiN aur karuuN kyaa
karte the bohat saaz aur aavaaz kii baateN
ab ilm huaa hamko ki hai soz-e-duruuN kyaa
marnaa hai to suqraat kii maanind piyuuN zahar
in rang badalte hue chehroN pe maruuN kyaa
fitrat bhii hai bebaak sadaaqat ka nasha bhii
har baat pe Khaamosh rahuuN, kuchh na kahuuN kyaa
jis ghar meN na ho taaza havaaoN ka guzar bhii
us ghar kii fasiiloN meN bhalaa qaid rahuuN kyaa
murjhaa hii gayaa dil ka kaNval dhuup meN aarif
khushbuu kii taraH is ke khayaaloN meN basuuN kyaa
(Arif Shafique)
----------------------------------
dukh dard meN hameshaa nikaale tumhaare khat
aur mil gayii Khushii to uchhaale tumhaare khat
sab chuuDiyaaN tumhaarii samandar ko sauNp diiN
aur kar diye havaa ke havaale tumhaare khat
mere lahuu meN guuNj rahaa hai har ek lafz
maiN ne ragoN ke dasht meN paale tumhaare Khat
yuuN to haiN beshumaar vafaa kii nishaaniyaaN
lekin har ek shae se niraale tumhaare khat
jaise ho umr bhar ka asaasa Ghariib kaa
kuchh is tarah se maiNne sambhaale tumhaare khat
ahl-e-hunar ko mujh pe Wasii etraaz hai
maiNne jo apne sher meN Dhaale tumhaare khat
Wasi Shah
-------------------------------
soz-e-Gam de mujhe usne ye irshaad kiyaa
jaa tujhe kashmakash-e-dahar se aazaad kiyaa
vo kareN bhii to kin alfaaz meN teraa shikwa
jinko terii nigah-e-lutf ne barbaad kiyaa
itnaa maanuus huuN fitrat se kalii jab chaTkii
jhuk ke maiNne ye kahaa, ''mujhse se kuchh irshaad kiyaa?''
mujhko to hosh nahiiN, tum ko Khabar ho shaayad
log kahte haiN ki tumne mujhko barbaad kiyaa
Shabbir Hasan Khan Josh Malihabaadi
-------------------------------------
ishq ke shole ko bhaDkaao ki kuchh raat kaTe
dil ke angaare ko dahkaao ki kuchh raat kaTe
hijr meN milne shab-e-maah ke Gham aaye haiN
chaara-saazoN ko bhii bulvaao ki raat kaTe
koii jaltaa hii nahiiN, koii pighaltaa hii nahiiN
mom ban jaao, pighal jaao ki kuchh raat kaTe
chashm-o-ruKhsaar ke azkaar ko jaarii rakho
pyaar ke naGme ko dohraao ki kuchh raat kaTe
aaj ho jaane do har ek ko badmast-o-kharaab
aaj ek ek ko pilvaao ki kuchh raat kaTe
koh-e-Gham aur garaaN, aur garaaN aur garaaN
Gham-zuud teshe ko chamkaao ki kuchh raat kaTe
Makhduum Muhiuddin
--------------------------
kaTegaa dekhiye din jaane kis azaab ke saath
ki aaj dhuup nahiiN niklii aaftaab ke saath
to phir bataao samandar sadaa ko kyuuN sunte
hamaarii pyaas kaa rishta thaa jab saraab ke saath
(saraab=mirage)
baDii ajiib mahak saath le ke aaii hai
nasiim raat basar kii kisii gulaab ke saath
fizaa meN duur tak marhabaa ke naare haiN
guzarne vaale haiN kuchh log yaaN se Khwaab ke saath
zamiiN terii kashish khiiNchtii rahii hamko
gaye zaruur the kuchh duur maahtaab ke saath
(Shaharyaar)
--------------------------------
kaun is raah se guzartaa hai
dil yuuN hii intizaar kartaa hai
dekh kar bhii na dekhne vaale
dil tujhe dekh dekh Dartaa hai
shahar-e-gul meN kaTii hai saarii raat
dekhiye din kahaaN guzartaa hai
dhyaan kii siiDhiyoN pe pichhle pahar
koii chupke se paaoN dhartaa hai
dil to meraa udaas hai naasir
shahar kyuuN saaeN saaeN kartaa hai
Naasir Kaazmii
---------------------------
E parindo! kisii shaam uDte hue
raaste meN agar vo nazar aaye to
giit baarish ka koii sunaanaa use
E sitaaro! yuuN hii jhilmilaate hue
uskaa chehraa dariiche meN aa jaaye to
baadaloN ko bulaa kar dikhaanaa use
E havaa! jab use niind aange lage
raat apne Thikaane pe jaane lage
uske chehre ko chhuu kar jagaanaa use
Khwaab se jab vo bedaar hone lage
phuul baadaloN meN apne pirone lage
mere baare meN kuchh na bataana use
Zeeshan Saahil
--------------------------------
jaisaa huuN vaisaa kyuuN huuN samjhaa saktaa thaa maiN
tumne puuchhaa to hotaa, batlaa saktaa thaa maiN
aasuudaa rahne kii Khwaahish maar gaii varnaa
aage aur bohat aage tak jaa saktaa thaa maiN
chhoTii moTii ek lahar hii thii mere andar
ek lahar se kyaa tuufaan uThaa saktaa thaa maiN
kahiiN kahiiN se kuchh misre, ek aadh Gazal, kuchh sher
is puunjii par kitnaa shor machaa saktaa thaa maiN
jaise sab likhte rahte haiN GazleN, nazmeN, geet
vaise likh likh kar ambaar lagaa saktaa thaa maiN
Iftikhar Aarif
--------------------------
Ae dil kissi ki yaad mein hota hai beqarar kyun,
Jis ne bhula diya tujhay, us ka hai intezar kyun,
Wo na mila ga ab tujhay jis ki tujhay talaash hai,
Rahon mein aaj beqafan teri wafa ki laash hai,
Yeh to zara bata mujhay tu nay kiya tha pyar kyun,
Ae dil kisi ki yaad mein hota hai beqarar kyun,
Anso jo thay rukay hoay, hans ke inhe baha bhi de
Jitnay hai daagh pyar ke ro key inhein mita bhi day
tu ne hai phir bana liya gham ko galay ka haar kyun
Ae dil kisi ki yaad mein hota hai beqarar kyun,
Aye gi na ab to roshni ab na kisi kay naam say,
Tu wo diya hai meray dil jo bhuja nahin sham se,
Tootay gi phir koi kiran tujh ko hai aitebar kyun,
Ae dil kisi ki yaad mein hota hai beqarar kyun,
Jis ne bhula diya tujhay uss ka hai intezar kyun...
--------------------------------
Zinda rahen to kya hai jo mar jayen ham to kya
duniya may Khamoshi se guzar jayen ham to kya
Hasti hi apani kya hai zamane ke samane
ek Khwab hain jahan may bikhar jayen ham to kya
Ab kaun muntazir hai hamare liye wahan
sham a gai hai laut ke ghar jayen ham to kya
Dil ki Khalish to sath rahegi tamam umr
dariya e Gam ke par utar jayen ham to kya
------------------------------------------------
Sohani Raat Dhal Chuki Na Janay Tum Kab Aaogay
Jahan Ki Rut Badal Chuki Na Janay Tum Kab Aaogay
* * = = * * ~ ~ * * = = * * ~ ~ * * = = * * ~ ~ * * = = * * ~ ~ * * = = * * ~
Nazaray Apni Mastiyan Dekha Dekha Ke Sogaye
Sitaray Apni Roshni Luta Luta ke Sogaye
Har Ek Shaman Jal Chuki Na janay Tum Kab Aaogay
Sohani Raat Dhal Chuki Najanay Tum Kab Aaogay
* * = = * * ~ ~ * * = = * * ~ ~ * * = = * * ~ ~ * * = = * * ~ ~ * * = = * * ~
Tarap Rahay Hein Hum Yahan, Tumharay Intizar Mein
Fiza Ka Rang Aa Chala Hay Mousam-e-Bahar Mein
Hawa Bhi Rukh Badal Chuki Na Janay Tum Kab Aaogay.
Sohani Raat Dhal Chuki Na Janay Tum Kab Aaogay.
No comments:
Post a Comment